കുട്ടികളിൽ പ്രായപരിധി അനുസരിച്ച് സോഷ്യൽ മീഡിയ ഉപയോഗത്തിൽ നിയന്ത്രണം കൊണ്ടുവരാൻ കേന്ദ്ര സർക്കാർ നടപടി ആരംഭിച്ചു. ഇതിന്റെ ഭാഗമായി പുതിയ ബിൽ പാർലമെന്റിൽ അവതരിപ്പിക്കാൻ സർക്കാർ തയ്യാറെടുക്കുകയാണ്.
8–12, 12–16, 16–18 എന്നിങ്ങനെ പ്രായപരിധി അടിസ്ഥാനമാക്കി സോഷ്യൽ മീഡിയ ഉപയോഗം നിയന്ത്രിക്കാനാണ് കേന്ദ്രത്തിന്റെ തീരുമാനം. കുട്ടികളിൽ സോഷ്യൽ മീഡിയ ഉപയോഗം മൂലം ഉണ്ടാകുന്ന മാനസികാരോഗ്യ പ്രശ്നങ്ങൾ വർധിക്കുന്ന സാഹചര്യത്തിലാണ് ഈ നീക്കമെന്ന് കേന്ദ്ര ഐടി മന്ത്രി അശ്വിനി വൈഷ്ണവ് വ്യക്തമാക്കി.
ഈ വിഷയത്തിൽ ബന്ധപ്പെട്ട സ്ഥാപനങ്ങളുടെയും വിദഗ്ധരുടെയും അഭിപ്രായങ്ങൾ കൂടി പരിഗണിച്ചായിരിക്കും അന്തിമ തീരുമാനമെടുക്കുക. അതേസമയം സോഷ്യൽ മീഡിയ പൂർണ്ണമായി നിരോധിക്കുന്നതിനോട് സർക്കാർ യോജിക്കുന്നില്ലെന്നും, പകരം പ്രായപരിധി കുറഞ്ഞ കുട്ടികൾക്കായി നിയന്ത്രണങ്ങൾ കൊണ്ടുവരുന്നതിലാണ് സർക്കാർ കൂടുതൽ ശ്രദ്ധ കേന്ദ്രീകരിക്കുന്നതെന്നും അദ്ദേഹം പറഞ്ഞു.
പാർലമെന്റിന്റെ മൺസൂൺ സമ്മേളനത്തിൽ ബിൽ അവതരിപ്പിക്കാനാണ് കേന്ദ്ര സർക്കാർ ലക്ഷ്യമിടുന്നത്.
