ചെന്നൈ: തമിഴ്നാട്ടിലെ ബിജെപിയുടെ മുൻ സംസ്ഥാന അധ്യക്ഷൻ കെ. അണ്ണാമലൈ പാർട്ടിയുടെ പ്രാഥമിക അംഗത്വത്തിൽ നിന്ന് രാജിവെച്ചതായി റിപ്പോർട്ടുകൾ. പാർട്ടി നേതൃത്വം അദ്ദേഹത്തിന്റെ രാജി അംഗീകരിച്ചതായും ദേശീയ മാധ്യമങ്ങൾ റിപ്പോർട്ട് ചെയ്യുന്നു.
കഴിഞ്ഞ ഏതാനും ആഴ്ചകളായി അണ്ണാമലൈയുടെ രാഷ്ട്രീയ ഭാവിയെക്കുറിച്ചുള്ള അഭ്യൂഹങ്ങൾ ശക്തമായിരുന്നു. കേന്ദ്ര നേതൃത്വവുമായി ഉണ്ടായ തന്ത്രപരമായ അഭിപ്രായവ്യത്യാസങ്ങളാണ് രാജിയിലേക്ക് നയിച്ചതെന്നാണ് റിപ്പോർട്ടുകൾ സൂചിപ്പിക്കുന്നത്.
രാജിക്കു പിന്നാലെ അണ്ണാമലൈ സ്വതന്ത്ര രാഷ്ട്രീയ പാത തിരഞ്ഞെടുക്കുമെന്നാണ് രാഷ്ട്രീയ വൃത്തങ്ങൾ വിലയിരുത്തുന്നത്. തമിഴ്നാട്ടിൽ പുതിയ രാഷ്ട്രീയ പാർട്ടി രൂപീകരിക്കുന്നതിനുള്ള സാധ്യതയും ചർച്ചയിലുണ്ട്. എന്നാൽ ഇതുസംബന്ധിച്ച ഔദ്യോഗിക പ്രഖ്യാപനങ്ങൾ ഇതുവരെ പുറത്തുവന്നിട്ടില്ല.
അണ്ണാമലൈയുടെ തീരുമാനം തമിഴ്നാട് രാഷ്ട്രീയത്തിൽ വലിയ ചർച്ചകൾക്ക് വഴിവെച്ചിരിക്കുകയാണ്. ബിജെപിയുടെ സംസ്ഥാന രാഷ്ട്രീയ തന്ത്രങ്ങളിലും ഈ നീക്കം പ്രതിഫലിക്കുമെന്നാണ് നിരീക്ഷകരുടെ വിലയിരുത്തൽ
