തിരുവനന്തപുരം: നീണ്ട വേനലവധിക്ക് ശേഷം സംസ്ഥാനത്തെ സ്കൂളുകൾ ഇന്ന് വീണ്ടും തുറക്കുന്നു.
പുതുവത്സര അധ്യയന വർഷത്തിലേക്ക് ആവേശത്തോടെയാണ് വിദ്യാർഥികൾ പ്രവേശിക്കുന്നത്.
പുതിയ അധ്യയന വർഷത്തിന്റെ ആദ്യ ദിനത്തിൽ സംസ്ഥാനത്തെ എല്ലാ സ്കൂളുകളിലെയും വിദ്യാർഥികൾ സൈബർ സുരക്ഷാ പ്രതിജ്ഞയെടുക്കും.
കേരള പൊലീസ് സൈബർ വിഭാഗത്തിന്റെ ‘കിഡ് ഗ്ലോവ് ‘
പ്രോജക്ട്ന്റെ ഭാഗമായി നടപ്പാക്കുന്ന ഈ സംരംഭത്തെക്കുറിച്ച് സംസ്ഥാന പൊലീസ് ആസ്ഥാനം പുറത്തിറക്കിയ പ്രസ്താവനയിലാണ് അറിയിച്ചിരിക്കുന്നത്. കുട്ടികളിൽ സൈബർ സുരക്ഷയെക്കുറിച്ചുള്ള അവബോധം വർധിപ്പിക്കുകയും ഡിജിറ്റൽ ലോകത്ത് സുരക്ഷിതമായി സഞ്ചരിക്കാൻ ആവശ്യമായ അറിവ് പകർന്നു നൽകുകയും ചെയ്യുകയാണ് പദ്ധതിയുടെ ലക്ഷ്യം.
ഓൺലൈൻ തട്ടിപ്പുകളും സൈബർ കുറ്റകൃത്യങ്ങളും വർധിച്ചുവരുന്ന സാഹചര്യത്തിൽ കുട്ടികൾ ഇത്തരം ചതിക്കുഴികളിൽ വീഴാതിരിക്കാനും സുരക്ഷിതമല്ലാത്ത ഡിജിറ്റൽ ഇടപാടുകൾ തിരിച്ചറിയാനും സഹായിക്കുന്നതിനായി വിപുലമായ ബോധവത്കരണ ക്യാമ്പയിനാണ് സംസ്ഥാനതലത്തിൽ ആരംഭിക്കുന്നത്.
പ്രതിജ്ഞയിലൂടെ ഉത്തരവാദിത്തത്തോടെയും ജാഗ്രതയോടെയും ഡിജിറ്റൽ സാങ്കേതികവിദ്യകൾ ഉപയോഗിക്കേണ്ടതിന്റെ പ്രാധാന്യം വിദ്യാർഥികളിലേക്ക് എത്തിക്കാനാണ് ശ്രമം. കുട്ടികളുടെ സുരക്ഷിതമായ ഓൺലൈൻ സാന്നിധ്യം ഉറപ്പാക്കുന്നതിനും സൈബർ ഭീഷണികളെക്കുറിച്ചുള്ള ബോധം ശക്തിപ്പെടുത്തുന്നതിനും ഈ സംരംഭം സഹായകരമാകുമെന്ന് അധികൃതർ അറിയിച്ചു.
പുതിയ അധ്യയന വർഷത്തിന് തുടക്കമാകുന്ന ദിനത്തിൽ വിദ്യാഭ്യാസത്തിനൊപ്പം സൈബർ സുരക്ഷയ്ക്കും പ്രാധാന്യം നൽകുന്ന ഈ നീക്കം വിദ്യാർഥികൾക്കും രക്ഷിതാക്കൾക്കും ഒരുപോലെ ഗുണകരമാകുമെന്ന് പ്രതീക്ഷിക്കുന്നു.
