മെക്സിക്കോ സിറ്റി: ലോകം കാത്തിരിക്കുന്ന ഫിഫ ലോകകപ്പ് 2026ന് ഇന്ന് ഔദ്യോഗിക തുടക്കമാകും. ചരിത്രപ്രസിദ്ധമായ മെക്സിക്കോ സിറ്റി സ്റ്റേഡിയത്തിൽ (മുൻ എസ്താദിയോ അസ്റ്റെക്ക) നടക്കുന്ന ഉദ്ഘാടന മത്സരത്തിന് മുന്നോടിയായി സംഗീതവും നൃത്തവും സാംസ്കാരിക വൈവിധ്യവും നിറഞ്ഞ വമ്പൻ ഉദ്ഘാടനച്ചടങ്ങാണ് ഫിഫ ഒരുക്കിയിരിക്കുന്നത്.ആദ്യ മത്സരത്തിൽ ആതിഥേയരായ മെക്സിക്കോ ദക്ഷിണാഫ്രിക്കയെ നേരിടും. ലോകകപ്പ് ചരിത്രത്തിൽ മൂന്നാം തവണ ഉദ്ഘാടന മത്സരത്തിന് വേദിയാകുന്ന ആദ്യ സ്റ്റേഡിയമെന്ന അപൂർവ നേട്ടവും മെക്സിക്കോ സിറ്റി സ്റ്റേഡിയത്തിന് സ്വന്തമാകും.
ഉദ്ഘാടനച്ചടങ്ങിൽ ആഗോള സംഗീതതാരങ്ങളായ ഷക്കീര, ബേർണ ബോയ്, ജെ ബാൽവിൻ, ടൈല, അലേഹാൻഡ്രോ ഫെർണാണ്ടസ് തുടങ്ങിയവർ വേദിയിലെത്തും. ഫിഫ ലോകകപ്പ് 2026ന്റെ ഔദ്യോഗിക ഗാനമായ “Dai Dai” ആദ്യമായി അവതരിപ്പിക്കപ്പെടുന്നതും ചടങ്ങിന്റെ പ്രധാന ആകർഷണങ്ങളിലൊന്നാണ്.ഇത്തവണ ലോകകപ്പ് ചരിത്രത്തിലെ ഏറ്റവും വലിയ പതിപ്പാണ് അരങ്ങേറുന്നത്. 48 ടീമുകൾ പങ്കെടുക്കുന്ന ടൂർണമെന്റിൽ 104 മത്സരങ്ങളാണ് നടക്കുക. അമേരിക്ക, കാനഡ, മെക്സിക്കോ എന്നീ മൂന്ന് രാജ്യങ്ങളിലായി 16 നഗരങ്ങൾ മത്സരങ്ങൾക്ക് വേദിയാകും.ഫുട്ബോൾ ആരാധകരെ ആവേശത്തിന്റെ കൊടുമുടിയിലെത്തിക്കുന്ന ഉദ്ഘാടനച്ചടങ്ങും ഉദ്ഘാടന മത്സരവും ലോകമെമ്പാടുമുള്ള കോടിക്കണക്കിന് പ്രേക്ഷകർ തത്സമയം വീക്ഷിക്കുമെന്ന് പ്രതീക്ഷിക്കുന്നു.
