ഫിഫ ലോകകപ്പ് 2026 ഗ്രൂപ്പ് ബി മത്സരത്തിൽ ഖത്തർ ഇന്ന് സ്വിറ്റ്സർലൻഡിനെ നേരിടും.
ലോകകപ്പ് ചരിത്രത്തിൽ ആദ്യമായി ഗ്രൂപ്പ് ഘട്ടം കടക്കുകയെന്ന ലക്ഷ്യത്തോടെയാണ് ഖത്തർ കളത്തിലിറങ്ങുന്നത്. ആതിഥേയരായിരുന്ന 2022 ലോകകപ്പിൽ മൂന്ന് മത്സരങ്ങളും പരാജയപ്പെട്ട ഖത്തറിന് ഇത്തവണ മികച്ച പ്രകടനം കാഴ്ചവെച്ച് ചരിത്രം കുറിക്കാനാണ് ശ്രമം.യൂറോപ്യൻ ശക്തികളിലൊന്നായ സ്വിറ്റ്സർലൻഡ് പരിചയസമ്പന്നരായ താരനിരയുമായി മത്സരത്തിനിറങ്ങുമ്പോൾ, ഏഷ്യൻ ചാമ്പ്യൻമാരായ ഖത്തർ സ്വന്തം ആക്രമണശൈലിയിലും വേഗതയേറിയ കൗണ്ടർ അറ്റാക്കുകളിലും പ്രതീക്ഷ വയ്ക്കുകയാണ്. ഗ്രൂപ്പ് ബിയിലെ ആദ്യ മത്സരമായതിനാൽ ഇരുടീമുകൾക്കും വിജയത്തോടെ ടൂർണമെന്റിന് തുടക്കമിടുക നിർണായകമാണ്.
കാനഡയും ബോസ്നിയ-ഹെർസഗോവിനയും ഉൾപ്പെടുന്ന ഗ്രൂപ്പ് ബിയിൽ മുന്നേറ്റസാധ്യത നിലനിർത്താൻ ഖത്തറിന് ഇന്നത്തെ മത്സരം നിർണായകമാകും. ഖത്തർ ആരാധകർ വലിയ പ്രതീക്ഷയോടെയാണ് ടീമിന്റെ ലോകകപ്പ് യാത്ര വീക്ഷിക്കുന്നത്.
