ദോഹ: റോഡ് സുരക്ഷയും പ്രാദേശിക വിപണിയിലെ ഉൽപ്പന്നങ്ങളുടെ ഗുണനിലവാരവും ഉറപ്പാക്കുന്നതിനുള്ള നടപടികളുടെ ഭാഗമായി, ഖത്തർ സ്റ്റാൻഡേർഡൈസേഷൻ ആൻഡ് മെട്രോളജി ജനറൽ ഓർഗനൈസേഷൻ (QS) വാഹന ടയറുകളുടെ വിൽപ്പന കാലാവധി നീട്ടുന്നതിനുള്ള പുതിയ സാങ്കേതിക നിബന്ധനകൾ പ്രഖ്യാപിച്ചു. പുതിയ ചട്ടങ്ങൾ പ്രകാരം യാത്രാകാർ, ബസുകൾ, ലൈറ്റ് ട്രക്കുകൾ എന്നിവയുടെ ടയറുകൾക്ക് നിലവിലെ വിൽപ്പന കാലാവധിക്കു പുറമെ 6 മാസത്തെ അധിക വിൽപ്പന അനുമതി ലഭിക്കും.
എന്നാൽ ഈ ഇളവ് സ്വയമേവ ലഭിക്കില്ല. അംഗീകൃത സാങ്കേതിക മാനദണ്ഡങ്ങളും സംഭരണ വ്യവസ്ഥകളും പാലിക്കുന്ന കമ്പനികൾക്കും ഡീലർമാർക്കും മാത്രമാണ് അധിക കാലാവധി അനുവദിക്കുക. അപേക്ഷകൾ പരിശോധിച്ചശേഷം എല്ലാ നിബന്ധനകളും പാലിക്കുന്ന കമ്പനികൾക്കാണ് അനുമതി നൽകുക.
അധിക വിൽപ്പന കാലാവധിക്ക് അംഗീകാരം ലഭിക്കുന്ന ടയറുകൾക്ക് ഉപഭോക്താക്കൾക്ക് കൂടുതൽ 3 മാസത്തെ വാറന്റിയും നൽകണം. ഇതോടെ ആ ടയറുകളുടെ ആകെ വാറന്റി കാലാവധി 1 വർഷവും 3 മാസവുമായി ഉയരും.
വാണിജ്യ-വ്യവസായ മന്ത്രാലയത്തിന്റെ 2026-ലെ നമ്പർ 35 തീരുമാനത്തിന്റെ അടിസ്ഥാനത്തിലാണ് ഈ പുതിയ ചട്ടം നടപ്പാക്കുന്നത്. ടയർ സംഭരണവുമായി ബന്ധപ്പെട്ട ഖത്തർ സ്റ്റാൻഡേർഡ് QS 581 പുതുക്കി നിർബന്ധിത സാങ്കേതിക ചട്ടമാക്കിയതിന്റെ ഭാഗമായാണ് ഈ നടപടി.
അംഗീകൃത മാനദണ്ഡങ്ങൾ പാലിക്കുന്നുണ്ടോ എന്ന് ഉറപ്പാക്കാൻ കമ്പനികളുടെ ഗോഡൗണുകളിലും ഷോറൂമുകളിലും വിൽപ്പന കേന്ദ്രങ്ങളിലുമായി പരിശോധനകളും ഓഡിറ്റുകളും തുടരുമെന്ന് അധികൃതർ അറിയിച്ചു. ഉപഭോക്തൃ അവകാശങ്ങൾ സംരക്ഷിക്കുകയും വിപണിയിലെ ടയറുകളുടെ ഗുണനിലവാരവും സുരക്ഷയും വർധിപ്പിക്കുകയും ചെയ്യുക എന്നതാണ് പുതിയ നടപടിയുടെ ലക്ഷ്യം.
